Блізкароднаснасць беларускай і рускай моў, асаблівасці руска-беларускага білінгвізму дашкольнікаў патрабуюць спецыфічных падыходаў да навучання дзяцей з рускамоўных сем'яў беларускай мове.
Часцей за ўсё для стварэння моўнага асяроддзя педагогі не рэалізоўваюць магчымасці нерэгламентыраванай дзейнасці, рэжымных момантаў, бо самі маюць недастаткова практычнага вопыту зносін з дзецьмі на беларускай мове ў паўсядзённым жыцці.
Адсюль вынікае, што метадычным службам на ўсіх узроўнях неабходна забяспечыць стварэнне моўнага асяроддзя для максімальных прафесійных і асобасных зносін педагагічных работнікаў на беларускай мове.
Таму пасяджэнне праводзілася з мэтай папулярызацыі і пашырэння сферы выкарыстання сярод педагогаў беларускай мовы як адной з дзяржаўных моў нашай краiны, удасканалення моўнай кампетэнтнасці спецыялістаў устаноў дашкольнай адукацыі.
Педагогі паглядзелі інтэгрыраваны занятак у старэйшай групе “Далучэнне да беларускiх народных традыцый», фальклорнае свята “Гуканне вясны”, таксама выставу дэкаратыўна-прыкладнога мастацтва, створаную рукамі дзяцей, выхавальнікаў і бацькоў яслей-сада № 20 г. Кобрына.
Намеснiкi загадчыкаў па аноўнай дзейнасцi Кобрынскага раена далучыліся да беларускай мовы і літаратуры праз квэст-гульню «Мова родная, мова любая, мова сэрца i душы…». Кожная каманда атрымала маршрутны ліст, у адпаведнасці з якім павінна была выконваць прапанаваныя заданні. Праз квэст-гульню былi утвораны ўмовы для самастойнай работы педагогаў. Квэст-гульня дапамагла дакрануцца да лексiчнага багацця беларускай мовы, праявіць сябе ў філалогіі і літаратуры, паказаць свае творчыя здольнасці.
Сістэмны падыход да стварэння камунікатыўнага асяроддзя для педагогаў і выхаванцаў спрыяе вырашэнню задач адукацыйнай вобласці «Развіццё маўлення і культуры маўленчых зносін» вучэбнай праграмы дашкольнай адукацыі.
Аліпава Т.М.